الاثنين، 21 ديسمبر 2009

التعليم في مصر ..الموضوع الثاني

حملة حقك من حقك .. الملف الثاني .. التعليم في مصر ..الموضوع

الثاني

كلمتين على الماشي : ============= 30 سبتمبر 2009 يوم مش هيتنسى في تاريخ التعليم المصري ... اليوم ده كان يوم صدور قرار وزير التعليم العالي بمنع حضور طلاب انتساب موجه المحاضرات في الجامعة .. ومش بس كده .. لا ده عملهم كمان كارنيه أحمر علشان يبقى علامة مميزة ليهم ... يعني بمعنى أصح حرم مواطنين مصريين من التعليم .. طيب نيجوا نشوف ياترى ده قانوني ولا لأ ؟؟ وياترى ايه حقوق طلبة انتساب موجه ؟؟ ========= جوه الموضوع : ========= الموضوع ده يا جماعة مالهوش أي أساس قانوني .. لا موجود في قانون تنظيم الجامعات 49 لسنة 1972 ولا حتى موجود في اللائحة التنفيذية بتاعته .. طيب الوزير طلعه ليه طيب ؟؟ بكل بساطة علشان يمهد إنه يلغي نظام انتساب خااالص .. ويستبدله بنظام التعليم عن بعد .. على أساس ان الطلبة بتفهم حاجة من المناهج في الكتب لما هتفهمها عن طريق وسائل الإعلام .. وده مش كلامي .. ده كلام المؤتمر القومي للتعليم العالي في 13 و 14 فبراير سنة 2000 .. واللي خرج بخطة استراتيجية لتطوير التعليم .. وطبعا جهات خارجية ليها مصلحة فيها .. ومنهم كان خبراء البنك الدولي المشاركين في الخطة دي ... طيب يعني هو ايه ذنب وزارة التعليم العالي في ان الطلبة ما بيفهموش من الكتب ؟؟ ماهو لو كان فيه تطوير للمناهج دي وتبسيط ليها من غير حشو .. ولو كان في رقابة على الدكاترة اللي بيكتبوا الكتب دي .. مكنش كل دكتور فضل يحشي في الكتاب لحد ما يعملوا 400 صفحة .. وييجي آخر الترم يلغي منه 300 صفحة ويقول للطلبة 50 صفحة سلف استادي (يعني ذاكروهم مع نفسكوا) والباقي يفضل يشرح فيهم على راحته بقى طول الترم .. ============== حقك واللي من حقك : ============== طيب ياترى ايه حقوق طلبة انتساب موجه ؟؟ من حقهم معاملتهم بالظبط زي طلبة انتساب العاديين ... يحضروا محاضرات ... كارنيهاتهم تبقى عادية ... زيهم زي أي طلبة في الجامعة .. ولو رجعنا للقانون هنلاقي ان التعليم ده حق لكل مواطن مصري زي ما قالت المادة 18 من الدستور .. ولو جينا نشوف في قانون تنظيم الجامعات واللائحة التنفيذية له .. هنلاقي ان طلبة انتساب موجه من حقهم معاملتهم زي أي طلبة ... زي ما قالت المادة88 من اللائحة التنفيذية لقانون تنظيم الجامعات 49 لسنة 1972 .. لكل طالب طلعله كارنيه أحمر .. ولكل طالب انتساب موجه اتغلى حضوره في الجامعة ... خليك واثق ومتاكد ان ليك حق ... الحق في التعليم زيك زي أي طالب ... القانون والدستور بيديلك الحق في ده ... حقك مش هيرجعه غيرك ... ومفيش حق بيضيع طول ما صاحب الحق بيدور عليه ... ==========================
===== ساهم في إمداد الموضوع بالمعلومات القانونية .. أ/ أحمد عزت مسئول وحدة الدعم القانوني بمؤسسة حرية الفكر والتعبير لحقوق الانسان

الثلاثاء، 15 ديسمبر 2009

حملة حقك من حقك .. الملف الثاني .. التعليم في مصر ..الموضوع الاول

حملة حقك من حقك .. الملف الثاني .. التعليم في مصر ..الموضوع الاول

الحملة برعاية رابطة شباب مصري مستقل معارض
كلمتين على الماشي : ============ التعليم في مصر... حاجة في منتهى الغرابة .. سواء كان ابتدائي او إعدادي او ثانوي أو جامعي .. المهازل في كل مرحلة تعليمية .. مالهاش عدد .. نظام تعليمي كل هدفه يطلع طالب حافظ .. بيصم وآخر السنة يسمع .. وبعد ما يطلع من الامتحان ولا كأن كان فيه مادة أصلا ذاكرها .. وطبعا كل مراحل التعليم مهمة وليها دورها .. بس حبينا يكون اهتمامنا بالمرحلة اللي نقدر نقول عليها فاصلة في رحلة تعليم أي مواطن مصري .. المرحلة اللي بعدها بيواجه الحياة بمشاكلها بأعبائها الاقتصادية ... مرحلة بعدها بيواجه المسئولية بجد .. مرحلة التعليم الجامعي .. =========== أسئلة على السريع : =========== انت بتدفع كام جنيه مصروفات في السنة ؟؟ هو ليه الحرس في الجامعة بيغلس عليك ؟؟ طيب ياترى القرار اللي عملوه علشان يلغوا بيه حضور طلبة انتساب ده ... ياترى القرار ده قانوني ؟؟ طيب القرار اللي منعوا بيه دخول الطالبات المنتقبات المدينة الجامعية ده برضه قانوني ؟؟ طيب ياترى فين حقوق الطالب في الجامعة ؟؟ ========= جوه الموضوع : ========= --------------------- 1- مصاريف الجامعة : --------------------- ياترى كل واحد من الطلبة في أي جامعة في مصر بيدفع كام في السنة ؟؟ ساعات تسمع أرقام خيالية ... جامعة الانتظام فيها 100 جنيه او اكتر .... و انتساب بيوصل لـ 500 جنيه وأكتر.. حد يقولي وهي دي أرقام خيالية ؟؟!! ده العادي أصلا ... لأ طبعا ده مش العادي .. ودي فعلا أرقام خيالية بالمقارنة المصروفات اللي قررها قانون تنظيم الجامعات.. --------------------- حقك واللي من حقك : --------------------- تعرف ان مصاريف طلبة انتظام 10.75 جنيه ؟؟ يعني تقريبا الجامعات بتاخد 10 أضعاف اللي المفروض يندفع من طلبة انتظام تعرف بقى ان مصاريف انتساب 13.25 جنيه ؟؟ يعني الجامعة بتاخد أضعاف أضعاف اللي المفروض يندفع من طلبة انتساب ... جايز يكون الكلام جديد عليك وجايز تستغربله .. لأنها مبالغ صغيرة جدا بالمقارنة مع اللي بتدفعه ... وكمان انت اتعودت على ان مصاريف الجامعة بتكون كده ... بس ياترى الكلام ده صحيح في القانون ولا لأ؟؟ الكلام ده صحيح مية المية .. والدليل ببساطة يا سيدي ان المادة 271 من اللائحة التنفيذية لقانون تنظيم الجامعات هي اللي قالت كده ... وماحصلش أي تعديل على المادة دي لحد وقتنا هذا ... وعلشان تتأكد بنفسك ده رابط هتلاقي عليه صورة لجدول المصاريف اللي المفروض تندفع , سواء كان لطلبة انتظام أو انتساب أو حتى الدراسات العليا ... http://www.facebook.com/photo.php?pid=134930&o=all&op=1&view= all&subj=192915121659&aid=-1&id=100000030331626&oid=192915121659 --------------------------
-------------------------- 2- حرس وزارة الداخلية في الجامعة :---------- أعتقد ان مفيش طالب في أي جامعة في مصر إلا وحرس الجامعة غلس عليه في يوم من الأيام .. مرة يوقفه على الباب ويغلس عليه في كارنيه .. وساعات يطلب منه البطاقة. ومرة يوقفه جوه الجامعة وبرضه يغلس عليه في بطاقة أو كارنيه, واللي مش عاجبه يتاخد على مكتب قائد الحرس ... وطبعا هاتك يا تهديد بفصل أو غيره .. --------------------- حقك واللي من حقك : --------------------- ده كله كان زمان ... دلوقت فيه حكم من محكمة القضاء الإداري لغى حرس الداخلية جوه الجامعة نهائيا , وأمر بتكوين وحدة خاصة بحرس الجامعة تكون تحت إشراف رئيس الجامعة وملهاش دعوة بالداخلية.. يعني أصلا مش من حق حرس الجامعة بتاع الداخلية ده انه يوقفك على الباب ولا يشوف بطاقتك ولا ده كله .. لأنه أصلا وجوده غير قانوني دلوقت في الجامعة .. طيب ياترى حتى لو فيه وحدة امن خاصة بالجامعة .. ياترى من حقه يشوفوا بطاقتك ؟؟ مفيش أي حد في الجامعة ولو حتى رئيس الجامعة له الحق انه يشوف بطاقتك ... إثبات شخصيتك الوحيدة جوة الجامعة هو كارنيه الجامعة .. طيب لو نسيت كارنيه الجامعة ؟؟ لو معاك بطاقة الترشيح بتاعتك اللي دخلت بيها الجامعة ...برضه ده إثبات إنك في الكلية الفلانية في الجامعة الفلانية .. طيب لو نسيت الاتنين ... بطاقة الترشيح والكارنيه ؟؟ لو نسيت بطاقة الترشيح والكارنيه .. لو معاك وصل دفعت بيه المصاريف .. ده برضه يثبت انك في الكلية .. بس انت ما تخليش حد يتكلم معاك نص كلمة .. انت يكون معاك كارنيه الجامعة بتاعك علشان ماحدش يكلمك كلمة مالهاش لزمة .. طيب لو فرض و الكارنيه لسه بيتعمل ولسه ما طلعش ؟؟ ليك الحق انك تاخد من شئون الطلبة اللي يثبت ان هم لسه ما طلعوش لك الكارنيه(إثبات كتابي) .. والورقة دي تثبت انك موجود في الكلية ومن حقك تدخل .. وفي كل الأحوال مفيش حد من حقه يشوف بطاقتك في الجامعة إلا إذا كان ما معكش اللي يثبت انك في الجامعة.. وده من حقهم طالما ان ما معكش كارنيه .. ولا معاك أي إثبات انك في الجامعة .. بس ده برضه مش من حق أي حد في الجامعة .. يعني مش مثلا موظف في شئون الطلبة أو في أي إدارة تانية يقولك طلع كارنيهك .. طيب لو فرض وفي أي حال من الأحول حد قالك تعالى معايا على قائد الحرس .. هتعمل ايه ؟؟ هتسأله الأول بكل شجاعة وهدوء عن السبب .. قالك سبب يستحق فعلا انك تروح لقائد الحرس .. مثلا فيه حد مقدم فيك شكوى .. أو انت مطلوب لتحقيق أو ما خلافه .. روح معاه .. وشوف ايه الحكاية .. طيب لو قالك أي سبب مالوش لزمة .. او عاوز ياخدك مجرد غلاسة كده .. ما تروحش معاه وصمم ما تروحش .. من حقك طبعا .. لو مد ايده عليك أو أهانك بأي لفظ .. من حقك تروح لقائد الحرس تعمل محضر هناك .. لو مارضاش اطلع على القسم فورا اعمل محضر ضده وضد قائد الحرس ..ولو كان فيه أي آثار للضرب عليك من حقك تروح أي مستشفى وتعمل تقرير طبي بيها .. وتقدمها في القسم علشان يرفقوها بالمحضر .. يتبع ...

السبت، 5 ديسمبر 2009

حملة حقك من حقك .. الملف الأول .. حقوق الانسان .. الجزء الأول(2)..نهاية الملف الاول

المشكلة التانية : لو أي حد عاوز يقبض عليك أو يفتشك في أي مكان انت فيه : --------------------------------------------- لو أي حد كان لابس ميري او مدني أو ايا كان وحب يقبض عليك او يفتشك , سواء كنت ماشي في الشارع او كنت راكب ميكروباص او كنت حتى سايق عربيتك .. ياترى هل من حقه ان يفتش البنت ؟؟ طيب والتفتيش الذاتي هل برضه من حقه ؟؟ هل من حقه يفتش عربيتك ؟؟ شنطة العربية أو التابلوه أو أيا كان ؟؟ طيب هل من حقه ان ياخدك القسم غصب عنك ؟؟ طيب تعمل ايه لو ده حصل ؟؟ ------------------ حقك واللي من حقك : ------------------ مش من حقه إلا اذا كان انت عليك حكم أو هربان من الجيش او الحاجات اللي ربنا يبعدك عنها دي .. وطبعا ده برضه حقك بالقانون والدستور ... زي ما قالت المادة 41 من الدستور ان مفيش حد من حقه يقبض عليك او يفتشك الا في حالتين .. اذا كنت حضرتك في حالة تلبس لا قدر الله ... او يكون معاه اذن من النيابة بالقبض او بالتفتيش ...غير كده لا من حقه يفتشك ولا ياخدك القسم ... طيب في حالة لو صمم يفتش بالعافية ؟؟ مش من حقه ان يفتشك ... هو كده بيقلبك مش بيفتشك ... ولو كنتي بنت مش من حقه يفتش شنطتك ...وبالرغم من ده مش هتسيب حقك ...طلعله كل اللي في جيوبك دلوقت من غير ما تخلي حد يلمسك ... يعني ما تخلهوش يفتشك ذاتي ... ولو صمم برضه يفتش بنفسه .. ماتخليهوش يفتش اماكن حساسة عندك .. سواء كنت ولد او كنتي بنت .. وفي حالة البنات لازم علشان تتفتش البنت ..لازم بنت زيها اللى تفتشها .. وهم بيبعتوا اشارة باللاسلكي علشان يجيبوا مندبوة تفتش اوممكن هو ينادي لأي بنت من الشارع تفتشك ... في حالة عكس كده بقى ...ده اسمه هتك عرض ... سواء كنت ولد او بنت وحبوا يفتشوكم بطريقة مهينة ... والله بقى ده عرضكم وشرفكم ... واللي يتهاون في عرضه وشرفه يبقى ما يستاهلش يعيش ... بعد التفتيش اللي حصل ده بدون وجه حق ... اطلع مباشرة على اقرب قسم اعمل محضر باللي حصل .. لو ما رضوش ... اطلع على مديرية الامن واعمل محضر عند مفتش الداخلية ...أو في النيابة ... طيب لو انت راكب ميكروباص .. وحد نزلك وقالك افتشك ؟؟ مش من حقه طبعا ... كل اللى من حقه انه ينزلك ويشوف بطاقتك ويبعت باللاسلكي اشارة يتحرى عنك ولو ما علكش أحكام يسيبك ... طيب لو انت سايق عربيتك ياترى من حقه يفتشها ؟؟ لأ طبعا ... مفيش أي تفتيش في أي حال من الاحوال لازم يحصل إلا باذن تفتيش ... لا شنطة العربية ولا التابلوه ولا أي حاجة ... ولا حتى من حقه ينزلك لا انت ولا اللى معاك .. ولا اركن على جنب ولا كل الكلام ده ...لكن في وقت الكمين من حقه يركنك على جنب لمدة ما تزيدش مثلا عن نص ساعة .. بس برضه مش من حقه ينزلك ولا يفتشك ولا ينزل اللى معاك ولا يفتشهم ... طيب لو ما معكش رخصتك ؟؟ مش من حقه برضه يفتش او ياخد اي اجراء غير انه يشوف رخصة العربية ويتأكد ان الاسم الى فيها هو اسمك وطبعا هيتأكد بأي تحقيق شخصية معاك ... وفي الحالة دي بيسحب منك رخصة العربية وبيديلك ايصال سحب لمدة أسبوع ..وبيسيبك طيب لو مامعكش لا رخصة عربية ولا اي حاجة تثبت انك صاحب العربية ؟؟ ساعتها من حقهم انهم ياخدوا العربية للقسم لحد ما يتأكدوا انها مش مسروقة .. طيب لو فرض وفي أي حالة من الاحوال اللي فاتت سواء كنت في الشارع او راكب ميكروباص او سايق عربيتك حد صمم ياخدك القسم غصب عنك ؟؟ دي هتحصل غالبا لو لقاك بتتكلم معاه وانت خايف ومهزوز .. ساعتها هيحس انك عامل عملة وخايف منه علشان كده ... وبعدين انت هتخاف منه ليه طالما انت في السليم ومفيش اى حاجة تخوفك ؟؟ وعلى العموم لو صمم ياخدك .. ما تروحش على طول .. اساله الأول ليه ؟؟ وقوله ان مش من حقه .. وانه كده بيخالف القانون وانك هتعمل فيه محضر وكل ده اتكلم وانت هادي وبالراحة ... بشجاعة وبأدب في نفس الوقت... ولو خدك برضه ... ساعتها روح معاه من غير ما تقاوم ... واعمل الحاجات اللي هاقولك عليها دي : ======================== 1- حاول تعمل مكالمة تليفون في الطريق لأي حد من قرايبك قوله على مكانك , لو خدوا منك التليفون , نقيلك أي عسكري صغير كده بقى يكون باين عليه غلبان , واديله الرقم وقوله يتصل بأهلك..احيانا بيبقى فيه عساكر غلبانين وولاد حلال . 2- أول ما توصل القسم اطلب انك تقابل المأمور . قابلته قوله واحكيله على كل اللى حصل وان الظابط خدك بالعافية , وصمم انك تعمل محضر للظابط .. لو المأمور مارضاش أو ما قبلتش المأمور بعد ما تطلع على طول من القسم روح النيابة التابع ليها القسم او لمفتش الداخلية في مديرية الامن واعمل محضر هناك , وده من حقك بالقانون زي ما قالت المادة 280 والمادة 282 من قانون العقوبات. ولو لا قدر الله وروحت معاهم وحبسوك حبس احتياطي مع ان ده مش من حقهم كمان ... لازم تبقى عارف ان مش من حقهم يحبسوك أكتر من 24 ساعة ودي المدة اللي من حقهم يحبسوك فيها .. وده كمان بس لو انت متهم بحاجة ... وفي خلال ااـ 24 ساعة دي بياخدوا أقوالك في محضر .. إما انهم يقولوا انك برئ فتروح .. أو لو ما قالوش انك برئ يبقى لازم تتعرض على النيابة فورااااا ... وطالب بحقك ان ما تفضلش أكتر من 24 ساعة معاهم وانك تروح النيابة .. النيابة هتلاقيها ارحم منهم وهتلاقى وكلاء النيابة محترمين عنهم . بكده نكون وصلنا لنهاية الجزء الاول كرامتك في بلدك ... وباقيلنا الجزء التاني كرامتك بره بلدك ... ولو فيه أي أسئلة تتعلق بالجزئين الأولانيين ... احنا مع بعض في أي وقت...اسئلونا هنا في التوبيك ...او ابعتلونا على إيميل الرابطة eioy.egypt@gmail.com استنونا باذن الله مع الجزء الاخير .. كرامتك بره بلدك ...

الخميس، 3 ديسمبر 2009

حملة حقك من حقك .. الملف الأول .. حقوق الانسان .. الجزء الأول

مجال حقوق الانسان مجال كبير أوي , وبيتضمن حاجات كتير أوي .. الحق في حياة كريمة والحق في السكن والحق في العلاج الآمن والحق في التعليم وغيره وغيره ... احنا اختارنا منه أهم جزئيتين وأبسط جزئيتين لأي مصري نتكلم عنهم .. اللي مفيش أي مواطن يقدر يعيش من غيرهم وكل حاجة علشانهم تهون .. اللي هم كرامة المواطن جوه مصر , وكرامته بره مصر .. ================== الجزء الأول : كرامتك في بلدك : ================== كتير مننا اتعرضوا لمواقف مع أفراد من الشرطة سواء كان أمين أو ظابط أو أيا كان ومعرفوش يتصرفوا فيها ازاي .. وسألوا نفسهم ياترى هو من حقه يضربني على قفايا ؟؟ هل من حقه يفتشني ؟؟ طيب من حقه يشتم ويشخط وينطر زي ما يكون اشتراني ؟؟ هل من حقه ياخدني على القسم ؟؟ طيب انا اتصرف معاه ازاي ؟؟ بص يا سيدي ..هنتكلم دلوقت عن شوية مشاكل ونقول الحلول بتاعتها مع بعض , ولو قابلتك أي مشكلة مش موجودة في اللى احنا قولناه ابعتلنا واحنا نرد عليك فيها ... --------------------------------------------------------- المشكلة الأولى : حد لابس ميري أو مدني ووقفك في الشارع : --------------------------------------------------------- طبعا أكيد معظمنا اتعرضنا للموقف ده ... في كمين أو غيره ... تلاقي واحد لابس ميري أو مدني يجي يقولك بطاقتك .. ويسألك رايح فين ؟؟ وجاي منين ؟؟ و ليه ؟؟ وعلشان ايه ؟؟ ومش بعيد كمان يفتشك ... ومش بعيد كمان انه ياخدك على القسم بدون سبب واضح ويقولك اشتباه او تحري ... في الاول بس علشان تبقوا عارفين ... مابقاش فيه حاجة اسمها اشتباه ... الاشتباه ده اتلغى من سنة 93 وده بحكم من المحكمة الدستورية العليا .. طيب امتى بتوع الشرطة بيوقفوا حد ؟؟ زي ما اتقال في القانون لما بيكون حط نفسه في موضع شك .. يعني ايه ... يعني مثلا واحد شايل تليفزيون وبيجري بيه وبيتلفت يمين وشمال .. ده اسمه موضع شك ... مثلا واحد واقف جنب عربية وعمال يتلفت .. واحد بيجري وعلى هدومه دم .. كده يعني .. ------------------ حقك واللي من حقك : ------------------ من حقك أي حد يوقفك في أي مكان كمين او غيره , وأيا كانت رتبته أو ايا كان لبسه ...انك تطلب منه يعرفك بنفسه الأول ... وهو اللي يثبت شخصيته الأول ... يعني لو قالك انا ظابط .. قوله لو سمحت كارنيهك ... هتقولي ماهو لابس ميري وفيه دبابير وحاجات كتير على كتفه ... ياعم انزل الوكالة هتلاقي بدل من دول على قفا من يشيل بدبابيرهم بنسورهم بسيوفهم ... ماتطلعلوش أي اثبات شخصية ليك غير لما هو يقولك هو مين الأول ويطلعلك اثبات شخصيته .. وبعدها من حقه انه يشوف بطاقتك أواثبات شخصيتك ( بطاقة أو جواز سفر أو رخصة سواقة ) وبس مش اكتر من كده ...يعني مش من حقه يفتشك ولا ياخدك على القسم ولا يضربك ولا كل الكلام ده ... وخليك واثق من نفسك وانت بتقوله كده ... لأن ده حقك .. لو لقاك مهزوز أو خايف ... هيحس انه هو الأقوى ويبدأ يتعامل معاك بعنف ... لو حس انك مش خايف وعارف حقك ... هتلاقيه يعاملك باحترام غصب عنه .. طيب ياترى ده حقك فعلا بالقانون .. آه من حقك ... القانون بيقول في المادة 24 مكرر من قانون الاجراءات الجنائية واللي انضافت بالقانون رقم 174 لسنة 1998 ان لازم كل واحد من افراد الشرطة ايا كانت رتبته لازم يعرف نفسه للمواطنين ... طيب لو فرض بقى وخد البطاقة وما دهالكش ؟؟ مش من حقه طبعا .. وساعتها من حقك تعمل ضده محضر كمان في أقرب قسم أو مركز ... وده برضه حقك بالقانون 143 لسنة 94 للاحوال المدنية وتحديدا في المادة 50 .. طيب لو فرض وقالك تعالى معايا على القسم ؟؟ اسأله ليه .. لو قالك اشتباه قوله الاشتباه اتلغى .. زي ما قولنا الاشتباه اتلغى فعلا من سنة 93 .. طيب لو قالك تحري .. قوله حتى لو تحري مش من حقك تاخدني القسم ... وده زي ما قالت المادة 362 من تعليمات النيابة .. طيب لو فرض بقى يا جميل و نسيت بطاقتك في البيت ؟؟ شوف يا سيدي .. في الحالة دي هتروح القسم أو المركز معاه ... متخافش ... مش هيحبسك لأن مش من حقه يحبسك ... هتتصل بحد من اهلك او اصحابك يجيبلك بطاقتك أو إثبات شخصيتك ... أو ممكن حل تاني انك هتتعملك مخالفة وهتدفع مبلغ ما يقلش عن 100 جنيه وما يزيدش عن 200 جنيه .. يعني ما تخليش حد ينصب عليك في أكتر من كده ... وكمان مش من حقه في الحالة دي انه يحبسك ... وده برضه من حقك بالقانون زي ما قالت المادة 68 من القانون 143 لسنة 94 للاحوال المدنية .. يتبع ....

حملة حقك من حقك .. الملف الأول .. حقوق الانسان .. الجزء الأول